వివాహ బంధం అంటేనే నమ్మకంతో కూడుకున్న రెండు జీవితాల ఉమ్మడి ప్రయాణం! ఎక్కడెక్కడో పుట్టి పెరిగిన ఇద్దరు వ్యక్తులు వివాహ బంధంతో ఒక్కటై.. బ్రతికి ఉన్నంత కాలం నమ్మకంగా, ఒకరికి ఒకరు తోడుగా కలిసి ఉండాలనుకుని చేసుకునే ప్రమాణం, చేసే ప్రయాణం! అయితే.. ఈ ప్రమాణం మధ్యలోనే బ్రేక్ చేసేవారు, ఆ ప్రయాణం మధ్యలోనే ముగించేసేవారు కొందరైతే.. కలిసి ప్రయాణిస్తూనే పక్క దారులు తొక్కేవారు మరికొంతమంది. వివాహేత సంబంధాలు పచ్చని సంసారంలో చిచ్చు పెడుతున్నాయి.
ఈ అక్రమ సంబంధాల వల్లో ఎన్నో ప్రాణాలు పోతున్నాయి. సుఖం కోసం పరాయి పురుషుడి మోజులో స్త్రీ లేకపోతే పరాయి స్త్రీ మోజులో పురుషుడు పడి ప్రాణాలు తీసుకుంటున్న ఘటనలు ఎన్నో చూస్తున్నాము. అయితే ఏయే నగరాల్లో ఈ వివాహేతర సంబంధాలు ఎక్కువగా ఉన్నాయి అనేదానిపై ఫ్రెంచ్ డేటింగ్ ప్లాట్ ఫాం గ్లీడెన్ అధ్యయనం చేసింది. ఈ అధ్యయనంలో షాకింగ్ విషయాలు వెలుగు చూశాయి. అయితే సమాజంలో విడాకులు, కుటుంబ కలహాలు పెరగడానికి వివాహేతర సంబంధాలే ప్రధాన కారణమని సర్వే నివేదిక తెలిపింది.
ముఖ్యంగా ఐటీ, వైద్య రంగాలకు చెందిన ఉద్యోగులే వివాహేతర సంబంధాల్లో ఉన్నట్లు ఫ్రెంచ్ డేటింగ్ ప్లాట్ ఫాం గ్లీడెన్ వెల్లడించింది. సర్వేలో పాల్గొన్న వారిలో 33 శాతం మంది ఒత్తిడికి గురవ్వడం, 58 శాతం మంది భావోద్వేగాల కోసం ఇలాంటి అక్రమ సంబంధాలను కొనసాగిస్తున్నట్లు గ్లీడెన్ తన నివేదికలో వెల్లడించింది. ఈ వివాహేతర సంబంధాల్లో హైదరాబాద్ నగరం అధికారికంగా టాప్ 5లో లేక పోవడం గమనార్హం. ఈ అక్రమ సంబంధాలు కలిగి ఉండడానికి అనేక కారణాలు ఉన్నాయని సర్వే చెబుతోంది.
సర్వేలు పలు కీలక విషయాలు వెల్లడైనట్లు చెప్పింది. విడాకుల కేసులను వాదించే న్యాయవాదులు ఈ అక్రమ సంబంధాలపై ఆందోళన వ్యక్తం చేస్తున్నారు. వివాహేతర సంబంధాల వల్ల ఎన్నో కుటుంబాలు నాశనమవుతున్నాయని, కొందరి జీవితాలు చీకటిమయంగా మారుతున్నాయని ఆవేదన వ్యక్తం చేశారు. వివాహేతర సంబంధాలు పెరగడానికి కారణం భావోద్వేగ అసంతృప్తి, వ్యక్తిగత అవసరాలు తీర్చకపోవడం, శారీరక – మానసిక సాన్నిహిత్యం లేకపోవడం, వివాహేతర యాప్ల వాడకం అని గ్లీడెన్ సంస్థ పేర్కొంది.
డేటింగ్ యాప్లో రిజిస్ట్రేషన్లు, వినియోగదారు కార్యకలాపాల విషయానికి వస్తే టైర్ 2 నగరాలు మెట్రోల కంటే చాలా ముందున్నాయని డేటా చూపిస్తుంది. డేటా కొత్త వినియోగదారులపై మాత్రమే కాకుండా వినియోగదారు కార్యాచరణ మరియు తీవ్రతపై ఆధారపడి ఉంటుంది.